Líst vel á þessa konu

Hún er trú skoðunum sínum og segir þær en fer ekki kringum þær eins og mörgum stjórnmálamanni er orðið tamt. Virðing gagnvart konum skapast með ákveðnum skoðunum án þess að þröngva neitt upp á neinn.

Það segir mér hugur að hún muni ná árangri í Afganistan því smásigur er í raun stórsigur. 

Ný forsetafrú Afgana styður slæðubannið af heilum hug

Það er gott að vera bjartsýnn

Bjartsýni hefur samt ekkert að segja ef ekkert er gert. Er þá ekki kominn tími að nýta sér bjartsýnina og koma hlutunum í verk?

Verkin tala.

Bjartsýnn um afnám gjaldeyrishafta

Verst að getum ekki samið um leið

Það er ekki nógu gott að fara í gegnum dómstóla til að komast að niðurstöðu varðandi gjaldtöku á ferðamannastöðum. Það þarf að ríkja sátt sem fær ferðamenn til að finna að þeir séu velkomnir að skoða svæðið. Í raun er fátt sem mælir á móti gjaldtöku en það er líka háð ákveðnum erfiðleikum nema svæðið sé lokað og afmarkað.

Sé verið að taka gjald þá þarf að vera mjög vel skilgeint í hvað gjaldið er notað og það ætti ekki að vera til þess að féfletta eigendur heldur mun frekar sé féið notað til að viðhalda svæðinu og gera það öruggara. Því miður er of mikill græðgisstimpill á ferðamennsku þessa stundina og hætta að allt floppi ef ekki sé stigið varlega til jarðar. 

Það hlýtur að vera hægt að ná sáttum í þessum málum en það gerist ekki með einhliða ákvörðunum heldur samkomulagi allra sem að koma.

Staðfesti lögbann á gjaldtöku

Ekki góðar fréttir

Sem faðir tveggja stúlkna þá finnst mér þetta ekki góðar fréttir. Það er alveg ótrúlegt hvað sambandið styrkist á þessum tíma og helst með að taka feðraorlof með barni þegar það er nýfætt. Það getur vel verið að tímabundin lægri laun geri hlutina erfiðari en mín skoðun er sú að styrkja böndin með börnum sínum er hafið yfir allan pening.

Það má alltaf redda peningum og vinna sig upp úr tímabundnum skorti. Það þarf að hafa fyrir hlutunum og þegar upp er staðið þá er betra að hafa minna af peningum og betra samband við börnin. Feður takið ykkur saman í andlitinu.

Feður taka síður fæðingarorlof

Sagan endalausa

Þetta fer að verða sagan endalausa hvenær niðurstöður koma úr þessum útreikningum. Held að fjölmiðlar séu meira spenntir en almenningur. Það er alveg ljóst á hvaða bili leiðréttingin er svo að hvort hún er 1,2 eða 4 miljónir skiptir ekki höfuðmáli.

Fyrir þá sem fá leiðréttingu þá skiptir auðvitað mestu máli hversu mikið mánaðarleg afborgun lækkar og vissulega munar marga um þá upphæð. Vonandi nota hana af skynsemi.

Lærdómurinn af þessu er að hugmynd sem kom strax fram við hrun að setja þak á verðbætur hefði verið besta lausnin og komið öllum til góða en eins og oft áður þá bregðast stjórnmálamenn alltof seint við og þá kostar það meira og minna gert.

Leiðrétting kynnt eftir næstu helgi

Skynsemi eða ekki?

Það virðist við fyrstu skoðun vera mjög skynsamlegt að draga sig í land á þeim forsendum að verið sé að gera upp hluti í kringum viðskipti Höllu. Hins vegar er ekki annað hægt en að hnjóta um í orðalagi yfirlýsingarinnar þegar segir að hún hafi aldrei átt hlut í Skeljungi þótt eignarhluti í Skeljungi hafi verið undir fyrirtæki sem var í hennar eigu. Það er eitt að vera þögull og víkjandi eigandi og skipta sér ekki að eignahlut í fyrirtæki en þegar komið er í eftirlit á vegum ríkisins þá gengur það ekki upp. Trúverðugleikinn snýst um að vita hvað sé að gerast í kringum þig og taka ábyrga afstöðu.

Skynsemin snýr því að Halla er algerlega búin að missa trúverðugleikann í starfið og sem betur fer grípur strax til aðgerða. Megi henni vegna vel í framtíðinni.

Hættir sem stjórnarformaður FME

Er ekki Ísland jafnaðarríki

Held það ríki mun meiri jöfnuður á Íslandi en margur vill meina. Ef tekið er t.d. veiðileyfagjald þar sem LÍÚ á að vera ríki djöfulsins þá er það svo fjarri sanni. Það er alltaf verið að horfa á örfáa og alhæfa um að það eigi við svo marga. Reynt að týna til öfund og magna upp deilur.

Nei á Íslandi hefur fólk það mjög svipað og getur leyft sér ansi margt. Íslenskt samfélag hefur breyst mikið á sl. 20 árum og til að mynda er yfirvinna mun minni í byggingarvinnu en var áður fyrr. Eru þeir sem ala á þessari vitleysu að Ísland sé ónýtt ekki uppteknir af gamalli mynd? Uppteknir af einhverju sem var en er breytt.

Held að Íslendingar hafi það of gott ef eitthvað er.

Mikill jöfnuður á alþjóðlegan mælikvarða

Athyglisvert miðað við áróðurinn

Þetta eru mjög athyglisverðar upplýsingar því miðað við allan áróðurinn undanfarin ár þar sem hamast hefur verið yfir verðtryggingunni þá velja hana samt flestir. Þetta er alveg í hrópandi ósamræmi við stefnu Samfylkingarinnar sem vill afnema verðtryggingu (og losna við krónuna) að fólk velur einmitt verðtryggingu.

Mér hefur alltaf fundist að Samfylkingin sé sá flokkur sem hlustar illa á þjóðina og stefna flokksins er á öndverðu miðað við meirihlutann. Samt lætur flokkurinn eins og hann sé með puttann á púlsinum hjá þjóðinni.

Verðtrygging er ekki alslæm eins og af er látið. Haldist verðbólga lág með aðhaldi í ríkisrekstri þá haldast afborganir mjög svipaðar sem gefur fólki tækifæri á að búa til áætlanir til framtíðar sem standast nokkuð vel. Þetta snýst ekki eingöngu um eignarhlut eins og umræða í kringum verðtryggingu er. Fólk þarf alltaf húsnæði yfir höfuðið og eignarhlutur skapast á lengri tíma.

Þessi reynsla sínir að stjórnmálaflokkum er ekki sjálfgefið að hafa vit fyrir fólki.

Flest heimili velja verðtryggð lán

Uppgjafarástand

Ástand þar sem gefist er upp gegn hlutunum er aldrei gott og leiðir ekki til neins annars en enn meiri vandræða. Það er eins og vanti trú í Evrópu að hægt sé að laga ástandið og takast á við hlutina. Eina sem gerist er að fleiri evrópulönd sýjast í vonleysishjal og þrauka í sínum vandræðum.

Íslenskir ráðamenn hafa viljað hampa ástandinu hér á landi hvernig viðsnúningur hefur orðið á málefnum þjóðarinnar. Það má samt ekki gleyma því að mikill flótti hefur verið frá landinu sem útskýrir að hluta til lausn á þeim málum sem þjóðin stóð frammi fyrir. 

Hins vegar var þessi uppgjafartónn aldei upp á yfirborðinu sem einnig skýrir hvers vegna ástand breytist. Þjóðin sætti sig ekki við vonleysið og það er ekki ráðamönnum að þakka.

„Baráttan gegn atvinnuleysinu er töpuð“

Eru ekki allir í áhættuhópi varðandi fíkniefni

Frekar skrýtin fyrirsögnin á þessari frétt því ætla mætti að allir væru í áhættuhópi gagnvart notkun fíkniefna og að missa sig í fíkninni. Enda segir yfirlæknirinn "sem og margir aðrir". 

Vissulega er það bagalegt að fólk fari svona með sig en þetta hefur reyndar fylgt mannkyninu frá upphafi að kunna sér ekki hóf.

Held að ráðið sé ekki að eltast við ákveðna hópa heldur reyna ná til fólks á einstaklings grundvelli. Ekki hef ég svarið hvernig slíkt væri gert. Hins vegar þegar lesin eru viðtöl við fólk sem nær sér frá fíkninni þá les ég alltaf að einsaklngsleg viðmið náðu að kalla fram breytingar. 

Það þarf sem sagt grundvöll sem miðar við einstaklinginn til að ná árangri. Nú er að leggja höfuðið í bleyti og finna þann grundvöll.

Fólk með ADHD í áhættuhópi